"笑傲江湖"數碼修復版DVD碟評

發表人 **goalkeeper** 發表於 2004-12-12, 13:39

小弟中學時代係金庸迷，所有佢嘅作品都睇過哂，最中意係射雕、神雕、倚天、書劍、鹿鼎記以及笑傲江湖，為左追睇倚天，可以幾晚唔瞓咁睇落去。其實金庸嘅小說，係冇可能响2小時內嘅電影交待哂，好似魔戒咁，拍十幾個鍾頭就差唔多，所以好多名義上打正金庸招牌嘅電影，都會將內容改到七彩，同原著有好大分別，呢點其實可以理解。呢套笑傲江湖亦不例外，如果你抱着睇同原著原汁原味嘅心情，你會絕對失望，事實上片長117分鐘，冇可能將一套四集嘅小說完全表達出泥。套戲係1990年拍，幕後班底可謂一時無兩，淨係導演陣容都嚇死你，包括胡金銓、徐克、程小東、李惠民，電影音樂就係黃霑負責，小弟亦都係想緬懷霑叔先買呢隻碟，而演員亦係本港九十年代嘅精英，包括許冠傑、葉童、張敏、張學友、元華、午馬、林正英等，以上嘅配搭，今日已冇可能再泥多次。
隻碟話係經過數碼修復，但畫汁只係一般，但以一套十幾年前嘅港產片能夠修復成咁，小弟都已收貨，而且此片有好多暗位，但noise都唔明顯，算係唔錯啦。而音效就真係麻麻，雖然係有dts同dd，但一聽對白就知係多年前港產片果種後期配音，如果你以影音發燒友嘅標準泥睇呢隻碟，對唔住你會失望，但如果你係好似小弟咁，想對霑叔致敬，同埋想睇番吓香港武俠電影全盛時期嘅其中一套代表作，咁呢隻DVD係值得珍藏嘅。隻碟以港產片泥講唔算平，要成一舊水，但有電影劇照送。