https://hk.finance.appledaily.com/finan ... 4/59065284【大棋局】美息倒掛金鈎唔使驚(Mr. Tregunter)
早前因為美歐以Operation Twist及LTRO去壓低長債息,令美歐國債孳息曲線平坦化。耶倫上場前就講過,任內要將孳息曲線拗番上。今個月初曾出現美國債5年及3年期孳息倒掛,即係借5年錢嘅利息平過借3年,阿哥有冇搞錯。由於過去出現孳息倒掛往往代表經濟衰退就快嚟料,投資者開始計數是否要離場。
正路情況,長期息口一定貴過短期。所謂孳息曲線拗上,就係大眾覺得經濟越來越好景,聽日借錢會貴過今日,孳息曲線像處於興奮狀態,昂首而起;孳息倒掛,就係預期聽日借錢會平過今日,激情過後,頭耷耷謝晒。美國停QE、停OT、加息、縮表,孳息曲線卻仍然平坦起唔到頭,出現格林斯潘謎題現象(詳見舊文《格林斯潘謎題再現》)。今個月初甚至出現孳息倒掛,搞乜?
美債5年及3年孳息倒掛,最主要原因係聯儲局的加息及縮表路徑預期最快2020年完結。如果按劇本行,美國息口大概兩年後見頂。兩年後,息口唔會貴過之前,甚至開始倒跌。從賭嘅角度睇即係賭輸機率封咗底,所以會有人賭價差,沽3年債買5年債,賭5年債價上。截至上週五,美債3年孳息為2.62%,5年為2.64%,倒掛現象已消失。所以今次債市的大戶係賭QE政策完結後的反饋作用,唔一定賭經濟衰退。其次,要判斷經濟是否迎來衰退,通常會睇2年同10年的孳息,而非看短期。經濟學家Michael McDonough統計過,美債2年同10年孳息倒掛,喺1978、1980、1988、1998、2005出現過,倒掛之後S&P 500重分別升多1%、3%、31%、12%、17%先見頂;由出現倒掛到經濟衰退嚟料,分別要等502、293、564、1073、704日,所以暫時唔使驚。
加息縮表劇本2020至2022年完成,但貿易戰開打,特朗普直頭話想炒聯儲局主席阻止加息。貿易戰對美中兩國經濟都有損害,特朗普要嘅係更長遠目標,即將中國納入美國主導的規則之內。可是選民未必同你睇咁長,因此特朗普施壓聯儲局,要在其任內將加息周期拖長,甚至拖到連任。暫停加息,後期再加,是拖長,不是終結。特朗普喊話要求減息,只係開天殺價。
一旦加息周期終結,也意味美國這輪經濟增長完結。於是中國也在賭,等你有衰退現象時有求於我,我又可以再大支嘢,今日讓步只係換時間;美國則賭下一次經濟衰退來臨前,已起碼搞掂你一半。微妙位置就在此,將決定往後誰領風騷。
Mr. Tregunter